ماسألتش نفسك إيه فعلا هدف فكرة التسويق الشبكي ؟؟ أحلى حاجه هو قد إيه لو سالت اي حد عن التسويق الشبكي ما حدش يقولك ما أعرفش. كل واحد عنده فلسفته ونظرياته الخياليه واللي يقولك بص بقى التسويق الشبكي ده عباره عن......وبيعملوا كذا......وأنا فاهم المجال كويس. تسأله درست المجال فين ؟؟ الحمد لله واخد شهاده في التسويق الشبكي من معهد عم أحمد للغات .
أهم شيئ إننا نعرف حقيقة القصه. وعشان كده هنفهم دلوقتي القصه وما فيها.
التسويق الشبكي هي عمليه تجاريه عاديه جدا بس حصل لها تغير بسيط عن النمط التقليدي. وهرسم المثال ده على (س) دة شركة. (س ) لما بدأت كانت تقدر تنزل في السوق عادي وتعمل دعايه لكن كانوا بيفكروا بره الصندوق. إزاي نقدر نزود الربح على كل منتج بنبيعه وكمان نزود المبيعات. فمسكوا أول نقطه، اللي هي الربح. عشان يزود الربح في حل من إتنين. يا يزود السعر على المستهلك يإما يلاقي طريقه يقلل التكلفه. بس هما لا حبوا يعملوا ده ولا ده. لقوا إن سعر المنتج في السوق بيبقى عباره عن سعر مواد الخام والتصنيع زائد نسبة ربح الشركة زائد الدعايه زائد نسبة ربح منافذ البيع. ففكروا ليه ما نلغيش منافذ البيع ونبيع مباشرتا للمستهلك بنفس السعر اللي كان هيتباع في منافذ البيع ونكسب إحنا نسبه ربح المحلات من غير ما نزود السعر أو نعمل أي حاجه. ودي كانت أول خطوة.
بالنسبه للنقطه التانيه وهي دي بقى النقطه المهمه. هي نقطه أزود المبيعات إزاي. لو سألت أي حد بتشتري حاجه معينه ليه ؟؟ في اللي هيقولك جوده. في اللي هيقولك سعر. في اللي بيحب يشتري ماركه معينه. في اللي بيحب يشتري حاجه للمنظره. كل واحد بيشتري لهدف معين. من الأخر، القيمه اللي موجوده ورا شراء منتج معين هو العامل المحرك للشراء. والقيمه زي ما قولنا ممكن تكون إحتياج المنتج نفسه أو ممكن تكون حاجه الشخص بيجيبها للمظهر العام. فالقيمه وراء المنتج بتختلف من شخص للتاني وعشان كده كل منتج بيتباع لفئه معينه من الناس حسب القيمه دي هتستهويهم ولا لا.
كل اللي عملته (س) إنها فكرت بره الصندوق. راحت دورت على قيمه في منتجاتها تستهوي كل الناس. ومن هنا ظهرت الفكره. إيه الشيء اللي هيفرق مع كل الناس أيا كان حالته الماديه إيه أو خلفيته إيه ؟ الناس بتدور على زياده الدخل. ما حدش يكره إنه يعمل فلوس. ومن هنا كان الإقتراح، ليه ما نخليش الناس تعمل فلوس كقيمه جديده بسبب المنتجات بتاعتنا ؟ ومن هنا كانت البدايه. طبعا لما فكروا نعملها إزاي، لقوا إن أفضل طريقه إنهم يدوا فرصة إمتلاك التوكيل للناس. وبما إن الفكره إنهم عاوزين يوصلوا للناس بشكل أقوى، فمش هيعقدوا الدنيا. بدل رأس المال الكبير والمبلغ التأميني وفتح مكان وكل النقاط دي. بدل المكان ومنافذ البيع والمخزن وكل ده، خلوا التعامل والمخزن يبقى كله إلكتروني بحيث إن يبقى فيه مرونه في الوقت والمكان. ومن حيث رأس المال. بدل كل المبالغ والتعقيدات، خلوا المشتري هو الوكيل في نفس الوقت. من هنا بقى في قيمه قويه وراء شراء المنتج وهي إمتلاك مشروع وتوكيل متكامل بسبب إقتناء لمنتج من الشركه. يعني كده اللي بيشتري بيبقى لهدف من إتنين. يإما أساسا كان هيجيب المنتج ده. يإما إتشجع لشراء المنتج عشان إمتلاك التوكيل بالشكل البسيط ده. ومن هنا المبياعات زادت عشان إنت مش بس بتخاطب اللي عاوز يشتري المنتج. إنت كمان بتخاطب اللي عاوز يفتح مشروع برأس مال بسيط ومن هنا بتوصل للناس كلها. في الحالتين الشخص بيقتني منتج قيم.
بعد كده حصل تطوير تاني. بدل ما يخلوا الوكيل لوحده وبيعمل كل مبيعاته لوحده. ممكن نخليه يقدر يختار شركاء يبتدوا معاه زيه ويديلهم الفرصه وبالشكل ده بيبني فريق عمل بيتحرك معاه بقوة. ومن هنا بدأت فكره التسويق الشبكي الفعليه. واللي بيشتغل في المجال بيتحرك في إتجاهين. الإتجاه الأول وهو عملية بيع فقط وليه ربح على كده. الإتجاه التاني اللي هو بناء فريق وشرح الفكره كاملا ومن هنا الشريك بيبقى مشتري برده لكن بسيب له إختيار المنتج المناسب له. ومن هنا بيتبني فريق من المشترين والوكلاء في نفس الوقت وبيتحركوا يشتغلوا مع بعض بقوة. ومن هنا الشخص بيبني فريق بيريحه مستقبليا وبيكون سبب في أرباح عاليه.
خلاصة الفكرة. التسويق الشبكي هي عمليه تجاريه عاديه حيث يكون المشتري وكيل في نفس الوقت ومسموح له بناء فريق من الشركاء يشتغلوا مع بعض. هو مشروع زي اي مشروع لكن تحركاته إلكتروني عشان كده له مرونه عاليه جدا في الوقت والمكان. تاني حاجه رأس ماله بسيط وهو بقيمة منتج يقتنيه الوكيل. تالت حاجه بسبب نمو الفريق بشكل تضاعفي، فالربح من وراء (س) بيكون قوي جدا للي يعمل في المجال صح.
الهدف وراء الفكره هو زيادة أرباح ومبيعات الشركه. لكن أزود مبيعاتي وفي نفس الوقت المشترين مني بيعملوا معايا فلوس أفضل بكتير من إنهم يكونوا مشترين بس. ودي سياسة الشركه.
هي دي فكرة التسويق الشبكي. ممكن تكون سمعت عن (س) فروحت سألت صديق أو حد من أهل البيت أو كنت في خروجه وسيره الفكره دي ظهرت. المضحك هو لما جربت أشوف الناس إيه معلوماتها عن (س) والتسويق الشبكي فوجئت إن كل شخص عنده نظرية ورأي في الفكره أبعد ما يكون من الواقع. زي نظرية مؤامره على فتي كتير واللي يحزن إن كل واحد عامل نفسه فاهم وما يقولش إنه مش فاهم. وإكتشفت إن معهد عم احمد للغات مخرج ناس كتير . فرجاءا، أي شخص متخرج من عند عم أحمد سيبه يقول اللي يقوله بس ما تديلوش إهتمام .
التسويق الشبكى بقيت ظاهره في مجتمعنا وغيرت مفاهيم كتير وحولت حياه ناس كتير من شخص بسيط إلى أصحاب الملايين. القصه كلها في الجديه والسعي وراء النجاح.
اهلا بك في التسويق الشبكي. أهلا بك في بيزنس القرن 21.
نقلا عن
